“Хотын соёл-иргэн бүрээс” сайн үйлсийн аяныг эхлүүллээ.

Нийгмийн хамгааллын тусгай төвөөс НИТХ-ын Тэргүүлэгчдийн 2018 оны 07 дугаар сарын 09-ний өдрийн 119 дүгээр тогтоол, Нийслэлийн удирдах ажилтнуудын өргөтгөсөн шуурхай зөвлөгөөнөөс өгөгдсөн үүрэг даалгаврын хэрэгжилтийг хангах ажлын хүрээнд сар бүрийн 09-ний өдөр “Хотын соёл –иргэн бүрээс” арга хэмжээг зохион байгуулж, нийслэлийн иргэдэд хотын цэвэр цэмцгэр, эрүүл аюулгүй орчныг бий болгоход иргэн бүрийн оролцоог нэмэгдүүлэх, зөв дадал хэвшил тогтоох, иргэдийн хандлагыг өөрчлөх зорилготой сайн үйлсийн аяныг 2019 оны 04 дүгээр сарын 09-ний өдөр эхлүүллээ. Уг арга хэмжээний хүрээнд тус төвийн үйлчилгээнд хамрагдсан иргэдийн сайн дурын оролцоог дэмжин Сонгинохайрхан дүүргийн 6 дугаар хороо Ханын материалын эцсийн буудал орчмын нийтийн эзэмшлийн талбайн хогийг цэвэрлэж, сандал, хогийн сав, мэдээллийн самбарыг угааж цэвэрлэлээ.

Мөн төвийн ажилтнууд, иргэдийн сайн дурын бүлэг төв зам дагуу ХМК-ын эцсийн буудлаас МУБИС-ийн автобусны буудал хүртэлх маршрутаар явж, авто замын хөвөө, явган хүний зам дагуу хаясан тамхины ишийг түүж цэвэрлэн, замд тааралдсан иргэдэд хогоо зориулалтын саванд хийх, зам хөндлөн гарахдаа зөвшөөрөгдсөн гэрлэн дохиогоор, гарцаар гарч хэвшүүлэх, хотоо цэвэр цэмцгэр байлгахад иргэн бүр үг үйлдлээрээ үлгэрлэн дагуулахыг уриаллаа. Автобусны буудлын ойролцоох аж ахуйн нэгжийн ажилтнуудад орчны 50 м талбайгаа тогтмол цэвэрлэж, хотын цэвэр цэмцгэр, аюулгүй байдалд хувь нэмрээ оруулж, сайн үйлсийн аянд нэгдэхийг уриаллаа.

Уг арга хэмжээг хотын иргэд тааламжтайгаар хүлээн авч, дэмжиж ажиллахаа илэрхийлж байв. Мөн таксины зогсоол дээр байсан жолооч нар автомашинаасаа бууж ойр орчмын тамхины ишийг түүлцэн, цаашид бусад жолооч нарт уриалгыг хүргэж ажиллахыг хүсэж байгаагаа хэлж, бидний ажилд амжилт хүслээ.